Arne-Ivar Kjerland: Thrond Sjurson Haukenæs. Mannen og verket (2020)

 

Thrond Haukenæs (1840-1922) var ein produktiv forfattar. På tretti år gav han ut rundt femti bøker, alle på eige forlag. Innhaldet femna vidt - han samla mellom anna eventyr, han samla historisk stoff, han skreiv reiseminne. Mykje var henta frå heimbygda Granvin, noko frå grannebygdene, noko frå andre stader. Når han ikkje skreiv var han gjerne på reis for å selja bøkene. Det var enklare for han, skriv Kjerland, det var enklare å vera respektert forfattar andre stader enn å vera han forfattaren i Granvin.

Boka er bygd opp strengt kronologisk. Me får høyra om oppvekstår i Granvin. Før han vart forfattar hadde han drive hotell og butikk i Granvin, men det gjekk ikkje heilt etter planen. Han gjekk konkurs i 1881, tre år før han debuterte som forfattar. Hadde butikken og hotellet gått betre kan det altså henda at han ikkje hadde skrive dei mange bøkene sine.

Kjerland kjenner Haukenæs godt, og skriv godt og kontant om livet hans. Alt i boka er likevel ikkje like vellukka. I ei bok som denne, der det handlar om ein til dels gløymd forfattar, er det heilt greitt med nokre smaksprøvar frå bøkene hans, men her vert det i meste laget. Det kjem òg eit langt referat frå ei av reisene hans, og her hadde boka tent på at han skar litt ned.

Guffen er lunken.